Sunday, September 7, 2014

10 صفات لمدير السوشيال ميديا

صفات مدير السوشيال ميديا
مدير السوشيال ميديا مش بس واحد بيحط بوستات ويرد على الناس في صفحة الفيس بوك وخلاص .. مدير السوشيال ميديا دا واحد لازم يتميز بمواصفات معينة ،، لان الشخص ده هو اللى بيقدم صورة عن شركتك او خدمتك ،فلو مش مناسب لمكانه اكيد هاتخسر بسببه كتير سواء ماديا او أدبياً ،، عشان كده لازم تعرف ايه هى اهم الصفات اللى لازم تكون موجودة في اى مدير سوشيال ميديا ..

اولا ،، لازم يكون متحمس لعمله ..

اى وظيفة عشان تضمن منها عائد كويس وتحقق نجاح فيها لازم يتوفر عنصر "الحماس" ليها .. خاصة في عالم التسويق الالكترونى مهم لـ مدير السوشيال ميديا انه يكون شخصية متحمسة ومحبة لعملها مش بس قاعد ياخد فلوس ويقضي شوية وقت على الفيس بوك يتسلي فيه وخلاص!

تانى صفة ،، لازم يكون "شخصية تحليلية" ..

مدير السوشيال مهم يكون شخص عنده قدرة على فهم الارقام ودلالاتها ،يعرف يحللها عشان يوصل لنتائج ايجابية في المستقبل .. وبيظهر ده من خلال التقارير اللى بيعدها وبتتضمن تحليل بيانات مؤشر الاداء اللى بيظهره الفيس بوك ..

تالت صفة ،، انه يكون منظم ،،

تخيل الشخص اللى بيدير حملات على الفيس بوك وتويتر وبينترست وجوجل بلس ويوتيوب وتملبر والانستجرام ولينكد ان .. شخص مش مرتب ! اكيد الدنيا هاتتكركب فوق دماغه ! 
مدير السوشيال ميديا يوميا لازم يتابع منافسيه ويقرأ عن الاتجاهات الجديدة في السوشيال ميديا ويعمل Check  على الـ Insights  ويراقب الجمهور وفي نفس الوقت لازم يبتكر افكار جديدة ويكتب تقرير عن كل شىء .. طبعا مش محتاج تتخيل كمية الفوضى اللى ممكن تحصل لو كان مدير السوشيال ميديا شخصية غير منظمة !!

رابع صفة ، الفضوووول:

الفضول بيخليك تتعلم اكتر عموما .. فلما تقرأ عن تحديثات الـtrends الجديدة هايخليك تعرف ازاى عالم السوشيال ميديا بيتغير وايه نوع التغييرات اللى بتحصل .. مهم لمدير السوشيال ميديا انه يعرف اكتر عن الجمهور المتابع والمستهدف ليه على قدر الامكان ،، ومعرفته بجمهوره مش معرفة اعمارهم ولا معرفة حالاتهم الاجتماعية ،لكن معرفة مدير السوشيال ميديا بجمهوره لازم تكون عملية اكتر ، يعنى يعرف فين بيشربوا قهوتهم المفضلة ،ومنين بيشتروا هدومهم ؟؟ وهل بياكلوا اكل من بره البيت واكتر مطعم بيفضلوه هو ايه ؟؟ هل بيستيقظوا الساعة 6 الصبح ؟؟ ولا من النوع الكسول ؟؟ 
مدير السوشيال ميديا مهم يكون عنده صورة ذهنية مفصلة عن عملائه المستهدفين .. 

الصفة الخامسة .. السرعة!

في احصائية بتقول ان 53 % من المستخدمين اللى بيغردوا على تويتر بيتوقعوا رد في خلال ساعة ..
عشان كده لو عندك مدير سوشيال ميديا مش سريع هاتفقد التواصل مع عملائك او متابعيك عموما .. وفي ادوات كتيييرة ممكن تبحث عنها عشان تساعدك كمير سوشيال ميديا في تتبع التفاعلات الجديدة اللى بتحصل على صفحاتك ودى قضية تانية ..

سادس صفة ،، الجراءة !

نقصد هنا بالجراءة انه يكون عنده الشجاعة الكافية لتجربة الافكار الجديدة .. الافكار اللى out of the box  ولكن في نفس الوقت تراعي قيم الـ brands 

سابع صفة ،، اللامبالاة!

متابعين هاييجوا ومتابعين هايروحوا ،، ناس هاتحب المنتج او الخدمة وناس هاتكرهها وناس ولا هاتهتم بوجودك من الاساس وشوية منهم هاينتقدوا نقد لاذع وقاسي .. مدير السوشيال ميديا مش لازم يهتم بكل الحاجات دى ،ولا ياخدها بشكل شخصي .. لازم يتصرف باحترافية ويقدم حلول للمشاكل ..

تامن صفة ، انه يكون "استراتيجي":

تواجد شركتك على مواقع السوشيال ميديا لا بد انه يكون على ارتباط بصورة وكيان الشركة مش شىء مستقل على الانترنت .. مدير السوشيال ميديا مهم يكون فاهم الفرق بين الاستراتيجية والـ tactics  اللى هاتساعده في تحقيق اهدافه ..

تاسع صفة ،، الصبر!

اي صفحة اعمال على الفيس بوك لازم تاخد وقت عشان تخلق مجتمع لها من خلال التسويق الالكترونى على السوشيال ميديا ووقت اكبر عشان تخلى المتابعين يحبوا الـ brand ويقتنعوا بيه ..  خليك عادل وماتسعاش ورا انك تكتر عدد المتابعين على حساب مصداقيتك معاهم .. ثقة المتابعين فيك اهم بكتير من عددهم ..  

الصفة العاشرة والاخيرة ،، التعاطف:

مدير السوشيال ميديا لا بد انه يكون شخص متعاطف مع العملاء او المتفاعلين معاه ،من خلال فهمهم والرد عليهم بلغتهم او بما يناسب عقليتهم ،ولكن مع الحفاظ على لهجة الـbrand


شركة التسويق الالكترونى بي جروب بتقدملك كل حلول التسويق الالكترونى واهم النصائح في عالم السوشيال ميديا ،، تابعنا ..

Comments
0 Comments